Sekretari amerikan i Shtetit Antony Blinken edhe njëherë ka paralajmëruar Moskën se do të përballet me pasoja të rënda nëse sulmon Ukrainën. Këtë deklaratë Blinken e bëri gjatë konferencës për shtyp me ministrin e Jashtëm rus Sergei Lavrov. Takimi mes dy diplomatve është mbajtur në kuadër të një samiti të Organizatës për Siguri dhe Bashkëpunim në Evropë. Tensionet mes Ukrainës dhe Moskës janë rritur në javët e fundit rreth dislokimit të trupave ruse pranë kufirit me Ukrainën. Sekretari Blinken vuri theksin tek diplomacia si zgjidhje për situatën. Ky I fundit tha se Rusia dhe Ukraina duhet të zbatojnë plotësisht detyrimet e tyre sipas procesit të paqes të Minskut të vitit 2014, i krijuar për t’i dhënë fund luftës mes separatistëve pro-rusë dhe forcave të qeverisë ukrainase në lindje të Ukrainës. Ai premtoi ndihmën e Uashingtonit në këtë drejtim. Moska fajëson Ukrainën dhe mbështetësit e saj perëndimorë për nxitjen e tensioneve, duke treguar atë që thotë se është një ngritje e ngjashme ushtarake ukrainase. Ukraina është bërë pika kryesore e përplasjes mes Rusisë dhe Perëndimit. Nga ana tjetër, Kievi thotë se Rusia ka dislokuar më shumë se 90,000 trupa pranë kufijve të Ukrainës.