Qeveria italiane do të detyrohet të vendosë kufizime të reja gjatë sezonit të festave për të vënë nën kontroll infektimet dhe për të evituar një valë të tretë dhe shkatërrimtare të koronavirusit. Kështu tha kryeministri i vendit, Giuseppe Conte në një intervistë të botuar të martën. “Kufizime të mëtejshme, tani janë të nevojshme. Ne duhet të evitojmë me cdo kusht valën e tretë sepse kjo do të ishte shkatërrimtare nisur nga këndvështrimi i humbjes së jetëve njerëzore”, tha Conte për La Stampën. Qeveria e koalicionit e drejtuar nga Conte po shqyrton rregulla më të rrepta në shkallë kombëtare për krishtlindje dhe vitin e ri pasi turma njerëzish mbushën qendrat e qyteteve gjatë fundjavës pasi Roma zbuti disa nga kufizimet e vendosura muajin e kaluar. Italia është vendi evropian me bilancin më të rëndë të viktimave nga koronavirusi me më shumë se 65 mijë njerëz që kanë humbur jetën që nga fillimi i pandemisë në shkurt. Conte tha se një fushatë vaksinimi do të ketë në shënjestër 10-15 milionë njerëz në mënyrë që të mund të sigurohen pasoja efektive për sa i takon imunitetit dhe një qëllim i tillë do të arrihej deri në fund të pranverës, ose në fillim të verës.