Presidentja e Kosovës, Vjosa Osmani ka ndërprerë vizitën në Shtetet e Bashkuara për tu kthyer në Kosovë. Ndërprerja e vizitës është bërë për shkak të zhvillimeve në veri të Kosovës, bëri të ditur Presidenca e Kosovës. Të shtunën, më 25 shtator, Qendra e Regjistrimit të Automjeteve në Zubin Potok u dogj, ndërsa u sulmua edhe Qendra e Regjistrimit Civil në Zveçan. Sipas hetimeve paraprake, autoritetet thanë se aty janë hedhur dy bomba dore, por të cilat “nuk kanë eksploduar”. Që prej 20 shtatorit, kur Kosova vendosi masën e reciprocitetit për targat nga Serbia, serbët kanë bllokuar dy rrugë pranë pikëkalimeve kufitare në Jarinjë dhe Bërnjak, që lidhin Kosovën me Serbinë. Për shkak të situatës së tensionuar, më 25 shtator, kryeministri Albin Kurti thirri një takim të Këshillit të Sigurisë. Osmani ka thënë më se Serbia është burimi "kryesor i destabilizimit në rajon" dhe ftoi bashkësinë ndërkombëtare që të veprojë. Më 19 shtator, presidentja Osmani udhëtoi drejt SHBA-së për të marrë pjesë në punimet e Asamblesë së Përgjithshme të Kombeve të Bashkuara.