Organizata Botërore e Shëndetësisë tha se deri më tani nuk është raportuar për ndonjë vdekje që lidhet me variantin e ri të koronavirusit, Omicron, variant që është konfirmuar në pothuajse 40 shtete të botës. OBSH tha sidoqoftë se ende duhet kohë për të kuptuar sesa infektues është ky variant, nëse shkakton sëmundje më të rëndë dhe sa janë efektive trajtimet dhe vaksinat kundër Omicronit. Të dhënat e para sugjerojnë se varianti është jashtëzakonisht infektues. Ky variant ishte identifikuar në nëntor në Afrikën e Jugut dhe mund të shkaktojë simptoma më të buta sesa variantet paraprake, përfshirë variantin Delta që është dominues në mbarë botën. Megjithatë, një numër i personave që janë infektuar me variantin Omicron, kanë kërkuar ndihmë mjekësore. Varianti Omicron po përhapet në kohën kur spitalet në disa shtete veçse janë të ngarkuara me pacientë të infektuar me variantin Delta. Në Evropë, vala e re e shkaktuar nga Delta ka detyruar qeveritë që të rivendosin masat, siç janë mbajtja e detyrueshme e maskës, distanca sociale, izolime dhe përshpejtim të vaksinimit. Agjencia për shëndetësi e Bashkimit Evropian ka paralajmëruar se Omicroni mund të jetë shkaktar i gjysmës së rasteve me COVID-19 në Evropë në muajt e ardhshëm. Sipas të dhënave paraprake të një studimi të kryer në Afrikën e Jugut thuhet se Omicroni ka tre herë më shumë gjasa që të shkaktojë riinfektime krahasuar me variantin Delta.