Asambleja e Përgjithshme e Organizatës së Kombeve të Bashkuara miratoi këtë të enjte, me shumicë votash një rezolutë të dytë që kërkon ndalim të menjëhershëm të luftës së Rusisë në Ukrainë. Në selinë e OKB-së në Nju Jork, 140 vende votuan pro, 38 abstenuan dhe pesë shtete votuan kundër masës. Ky votim erdhi pas miratimit të një rezolute të ngjashme më 2 mars e cila kërkonte që Rusia të ndalonte menjëherë avancimin e trupave rusë në Ukrainë dhe u miratua nga 141 vende. Të mërkurën Ukraina paraqiti rezolutën e re, të përgatitur fillimisht nga Franca dhe Meksika, në një seancë urgjente të Asamblesë së Përgjithshme. Rezoluta e miratuar implikon në mënyrë specifike Moskën dhe kërkon një ndërprerje të menjëhershme të armiqësive nga Federata Ruse kundër Ukrainës, në veçanti të çdo sulmi kundër civilëve dhe objekteve civile.