Vrasja e 51 vjeçarit Anton Keli ka rikthyer në skenë vrasjet serial që kanë nisur në vitin 2016 e mesa duket vijojnë ende. E radhës është ekzekutimi i Anton Kelit që mbrëmjen e kësaj të marte u qëllua për vdekje, teksa ishte në makinën e tij taksi. Në Rrëshen ekzekutimet kanë nisur me vrasjen e Sajmir Jakut në 9 shtatorin e vitit 2016, që në atë kohë mbante detyrën e drejtorit të Tensionit të Lartë në Operatorin e Shpërndarjes së Energjisë elektrike. Atëherë u dyshua se dy persona të armatosur qëlluan për vdekje zyrtarin. Si në çdo krim të këtij lloji, pas vrasjes, autorët braktisën automjetin në një fshat të Kurbinit, ku e dogjën dhe më pas u larguan. Ngjarja mbeti e pasqaruar, edhe pse me dhjetëra veprime hetimore u kryen për disa muaj me radhë, por përfundimisht ngjarja ka mbetur pa autorë.