Një video e pabesueshme, tregon momentin kur një helikopter rus shpërthen në qiell pasi trupat ukrainase e godasin atë. Ministria ukrainase e mbrojtjes ka ndarë pamjet ndërsa ajo vazhdon të flasë për rezistencën e fortë të trupave përballë pushtuesve. Imazhet video, tregojnë atë që besohet se është një helikopter rus Mi-24 Hind, që fluturon mbi një fushë. Më pas, nga e djathta, vjen një raketë, me gjasë një Stinger, që e godet në qendër helikopterin. Para se pilotët të mund të lëshojnë kundërmasat, raketa e godet atë dhe mjeti kthehet në një lëmsh të madh zjarri. Ai rrotullohet për pak caste në ajër para se të shpërthejë dhe të bjerë në një fushë, me një qytet që shihet në sfond. Videoja besohet se është filmuar në afërsi të Kievit. Ukraina më herët ka thënë se ka rrëzuar më shumë se 30 helikopterë dhe 30 avionë ushtarakë rusë. Moska nuk ka mundur ende të sigurojë superioritet në ajër, dicka që po pengon dukshëm pushtimin e putinit. “Ja se si pushtuesit rusë po vdesin. Këtë herë, në një helikopter”, tha ministria ukrainase e mbrojtjes. Ndërkohë në një tjetër rajon në Ukrainë, një avion ushtarak rus është fiksuar në kamera teksa rrëzohet pasi goditet nga një raketë. Ai u rrëzua mbi Chernihiv, me videon që tregonte edhe banorët lokalë që brohorisnin.