Rekrutët e ushtrisë ruse në rajonin e Donbasit, janë dërguar në vijën e frontit kundër trupave ukrainase pa trajnim, pa ushqim e ujë dhe pa armët e duhura. Agjencia e lajmeve reuters citon disa dëshmitarë që tregojnë se rekrutët e patrajnuar dhe papajisur me gjithcka u nevojitej niseshin në luftë dhe kjo tregon se sa të kufizuara janë tani burimet ushtarake në dispozicion të kremlinit, ndërkohë që lufta ka hyrë në muajin e dytë të saj dhe forcat ruse janë përballur me probleme logjistike dhe zbrapsur madje nga rezistenca ukrainase...Një nga këta rekrutë, një student i regjistruar pranë forcave ushtarake në fund të shkurtit, tha se një bashkëluftëtar i kishte thënë të përgatitej për të zbrapsur një sulm nga forcat ukrainase në donbasin jugperëndimor, por ai vetë nuk dinte as se si të shkrepte një armë automatike. Studenti dhe njësia e tij i ishin kundërpërgjigjur sulmit ukrainas dhe i shpëtuan kapjes rob, por vetë ai ishte plagosur në një sulm të mëvonshëm. Agjencia e lajmeve reuters, shkruan se disa prej këtyre rekrutëve u janë dhënë pushkë të quajtura Mosin, të prodhuara në fund të shekullit të shkuar dhe të nxjerra nga prodhimi dekada më parë. Ndërkohë që ata rrëfejnë se janë detyruar të pijnë ujë nga burime apo puse të ndotura për shkak të mungesës së furnizimeve.