Policia italiane po heton sulmet seksuale gjatë natës së vitit të ri mbi të paktën nëntë gra në Milano që kanë cuar në operacione kontrolli pas identifikimit të 18 të dyshuarve si autorë. Situata kujton sulmet famëkeqe të natës së vitit të ri në Këln, në 2016-ën, dhe ndodhën ndërsa njerëzit po festonin në Piazza del Duomo në Milano. Policia tha se ka identifikuar 15 burra dhe djem, të moshës nga 15 deri në 21 vjec, që edhe u vunë në shënjestër të operacioneve të kryera një ditë më parë në qytetet veriore të Milanos dhe Torinos. Të dyshuarit u përshkruan si të huaj ose italianë me origjinë afrikano veriore. “Të rinjtë që kanë sulmuar seksualisht vajzat në Piazza Duomo në Milano, natën e vitit të ri, janë identifikuar”, tha policia në një deklaratë. Përmes imazheve të kamerave të sigurisë, dëshmive të personave të ndryshme dhe gjurmimit në median sociale, policia ka mundur të kuptojë rrjedhën e tre episodeve të ndryshme të dhunës të kryera kundër nëntë vajzave, atë natë – thuhej më tej. Në njërin agresion, një 19 vjecare që po festonte bashkë me një mike, u sulmua nga një grup të rinjsh rreth orës 1.30 minuta. Shoqja e saj kishte mundur ti shpëtonte bandës, por adoleshentja tjetër jo. Mes viktimave ishin edhe dy turiste gjermane.