Ministri i Brendshëm Priti Patel njoftoi se Britania e rriti të hënën nivelin e saj të gatishmërisë ndaj kërcënimit nga terrorizmi pas shpërthimit të një taksie para një spitali në qytetin e Liverpulit, për të cilin policia tha më herët se po trajtohet si një incident terrorist. Një pasagjer humbi jetën dhe shoferi i taksisë u plagos nga shpërthimi. Niveli i ngritur i gatishmërisë nënkupton se ka gjasa të mëdha për sulme terroriste. Kryeministri Boris Johnson gjithashtu kryesoi një takim emergjence në përgjigje të incidentit.Autoritetet thonë se pasagjeri në taksi mbante në dorë një pajisje shpërthyese të improvizuar dhe kërkoi që të dërgohej në Spitalin e Grave në Liverpul, por motivi, apo ajo që shkaktoi shpërthimin, nuk janë ende të qarta. "Edhe pse motivi i këtij incidenti ende nuk dihet, duke patur parasysh të gjitha rrethanat, ai është konsideruar si një incident terrorist dhe njesia kundër terrorizmit po vazhdon hetimet. Po vazhdojmë përpjekjet për të kuptuar se si është ndërtuar pajisja, motivin e incidentit dhe nëse dikush tjetër ishte i përfshirë në të", tha Russ Jackson, shef i njësisë kundër terrorizmit në North Ëest. Pasagjeri vdiq nga shpërthimi dhe policia publikoi identitetin e tij. Bëhet fjalë për një jordanez që ishte konvertuar në anglikan dhe kishte ndryshuar madje edhe emër, në Enzo Almeni. Besohet se ai e kreu aktin në shenjë hakmarrjeje për mos dhënien e azilit politik. Policia kishte arrestuar katër persona në lidhje me ngjarjen por tani i ka lënë ata të lirë.