NATO ka publikuar së fundmi një raport prej më shumë se 150 faqe, ku ka prezantuar strategjinë e re të mbrojtjes pas pushtimit të Ukrainës, por duke u kërkuar edhe vendeve anëtare, përfshirë edhe Shqipërinë të rrisin shpenzimet e mbrojtjes për t’i bërë ballë agresionit rus. Aleanca paralajmëron vendet anëtare se Presidenti Putin ka qenë i qartë se objektivat e tij nuk kufizohen vetëm në Ukrainë, duke kujtuar se jo vetëm Moska, por edhe Kina po kërcënojnë aleancën të mos pranojë me anëtarë të rinj. NATO paralajmëron se bota ka hyrë në një epokë të re në sigurinë globale, duke u kërkuar të gjitha vendeve që janë në aleancë të jenë vigjilente dhe të rrisin gatishmërinë për sfidat që paraqet e ardhmja. Në këtë raport, ku Shqipëria përmendet në 29 faqe, NATO ndalet edhe tek stërvitjet Defender Europe 21, që u mbajtën në vendin tonë dhe planet për modernizimin e bazës së Kuçovës. NATO thotë se aleanca përballet me sfidën më të madhe të sigurisë që nga fundi i Luftës së Ftohtë, duke u kërkuar vendeve anëtare të rrisin investimet, të modernizojnë ushtrinë dhe të forcojnë aftësitë mbrojtëse.