Kërcënimet e fundit të presidentit rus, Vladimir Putin ndaj NATO-s nuk kanë ndezur kambanat e alarmit në Bruksel, shkruan të shtunën Dojce Velle duke cituar Putinin që tha më herët se nëse shtetet e aleancës lejojnë Ukrainën të përdorë raketa perëndimore në territorin rus, atëherë NATO do të ishte në luftë me Rusinë. Një përgjigje nga NATO lidhur me këtë deklaratë, nuk pati të premten, thotë Dojce Velle. Sekretari i Përgjithshëm në largim i NATO-s, Jens Stoltenberg, ka deklaruar vazhdimisht se NATO si organizatë nuk do të marrë pjesë aktive në mbrojtjen e Ukrainës kundër agresorit rus. NATO ka dy detyra, tha Sekretari i Përgjithshëm gjatë një vizite në Uashington në qershor: "Njëra është të mbështesë Ukrainën. Tjetra, të parandalojë që konflikti të përshkallëzohet në një konflikt gjithëpërfshirës midis Rusisë dhe NATO-s në Evropë". NATO mbetet një aleancë mbrojtëse, tha Stoltenberg, dhe sulmuesi është Rusia. Kreu i shtetit rus, Vladimir Putin i tha gazetarëve të enjten se ai do t'i përgjigjej në përputhje me rrethanat kërcënimeve nga NATO. Por ai e la të hapur se çfarë donte të thoshte me këtë. Presidenti rus ka bërë disa herë deklarata të tilla. Madje të besuarit e tij në parlamentin rus kërcënuan, se do të përdornin edhe armë bërthamore.