Bizneset në vend po vuajnë gjithnjë e më shumë mungesën e fuqisë punëtore, si pasojë e emigracionit. Sipas kompanive në vend, një ndër pozicionet me mungesë të lartë është gjetja e shoferëve. Sipas Monitor, mungesa e shoferëve po haset si nga kompanitë distributore të artikujve ushqimore, të transportit urban dhe transportit ndërkombëtar të mallrave. Për të parandaluar përshkallëzimin e mungesës për gjetjen e drejtuesve të mjeteve, nga sektori privat, po zbatohet politika e rritjes së pagave. Vështirësi po hasen edhe në gjetjen e drejtuesve të kamionëve që transportojnë mallrat e importuara jashtë. Sipas kompanive vendase, 25 deri 30% e mjeteve qëndrojnë pa punë, pasi mungojnë drejtuesit e kamionëve. Kjo mungesë vjen për shkak të emigrimit të shoferëve drejt vendeve të BE-së, veçanërisht në Gjermani për paga më të larta. Paga minimale e drejtuesve të kamionëve në Shqipëri varion nga 500 deri në 600 euro, ndërsa maksimalja nis nga 1,000-1,500 deri 2,000 euro. Rrogat për drejtuesit e kamionëve në Europë nisin nga 2,000 euro. Sakaq kriza e mungesës së shoferëve po përshpejtohet me shpejtësi edhe në Europë. Sipas raportit IRU, Evropës mund t’i mungojnë mbi 2 milionë shoferë deri në vitin 2026, duke ndikuar në gjysmën e të gjitha lëvizjeve të mallrave dhe miliona udhëtime pasagjerësh.