Ashtu siç ishte paralajmëruar edhe më herët, Shtetet e Bashkuara pritet të bëjnë ndryshime në kontributin e tyre në misionin e NATO-s në Kosovë, KFOR, në kuadër të një procesi të rishikimit të pranisë ushtarake të Aleancës në vend. Vendimi sipas Komandës Evropiane të ShBA, bazohet në rishikimin vjetor të bërë nga Komanda Supreme e Forcave Aleate në Evropë. Prania e KFOR, vijon të konsiderohet nga SHBA, si një komponent kyç të stabilitetit rajonal në Ballkanin Perëndimor. Javën e kaluar, NATO-ja njoftoi se do ta zvogëlojë gradualisht praninë e saj në Kosovë gjatë vitit të ardhshëm, për shkak të përmirësimit të situatës së sigurisë. Aktualisht, KFOR-i përbëhet nga mbi 4.600 trupa nga 31 vende, ndërsa mbetet si reaguesi i tretë i sigurisë në Kosovë, pas Policisë dhe EULEX. Misioni është përgjegjës për sigurinë përgjatë kufirit me Serbinë, ndërsa në pjesët e tjera të vijës kufitare përgjegjësinë e ka Policia e Kosovës.