Prokuroria e Posaçme Kundër Korrupsionit dhe Krimit të Organizuar SPAK ka mbyllur hetimet dhe ka çuar për gjykim 10 zyrtarët dhe ish zyrtarët të Ministrisë së Brendshme, të përfshirë në skandalin e tenderit të uniformave të policisë. Tashmë të gjithë ish zyrtarët e akuzuar për korrupsion do të përballen me akuzat në Gjykatën Kundër Krimit dhe Korrupsionit të Organizuar. Dëmi ekonomik që i kanë shkaktuar buxhetit të shtetit si pasojë shkeljes së barazisë në tendera arrin në 2.8 miliarde leke. Nwn akuzw janw ish drejtoresha e Agjencisë së Blerjeve të Përqendruara Edlira Naqellari dhe bashkëpunëtorët e saj, Flutura Çekrezi, Ani Omuri, Kleivis Hasani, Anisa Bogdani, Kreshnik Bejkaj, Fatmir Demneri, Mariglen Buzali, Gëzim Mingaj dhe Aurora Mulla. Nga aktet e administruara gjatë hetimit ka rezultuar se në maj 2020 në Agjencinë e Blerjeve të Përqëndruara në Ministrinë e Brendshme është zhvilluar procedura e prokurimit për llogari të Autoritetit Kontraktor, Drejtoria e Përgjithshme e Policisë së Shtetit, me objekt “Blerje dhe shpërndarje e uniformave dhe këpucëve të Policisë së Shtetit”, për 4 vjet, me fond limit 2.800.347.570 lekë. Nga hetimi kanë rezultuar veprime të kundërligjshme të bëra nga: Drejtoresha e Agjencisë së Blerjeve të Përqendruara Edlira Naqellari , në bashkëpunim me anëtarët e Njësisë së Prokurimit Flutura Çekrezi; Anisa Bogdani; Ani Omuri; Kleivis Hasani; si dhe anëtarët e Komisionit të Vlerësimit të Ofertave Kreshnik Bejkaj, Fatmir Demneri, Mariglen Buzali dhe Gëzim Mingaj , të cilët, në kundërshtim me rregullat e prokurimit publik, kanë favorizuar bashkimin e subjekteve juridike të shpallura fituese në kundërshtim me rregullat e prokurimit publik, duke sjellë si pasojë cënimin e lirisë së pjesëmarrësve në tendera dhe krijimin e avantazheve të padrejta për palët e treta. Arrestimet e 10 zyrtarëve dhe ish zyrtarëve janë bërë në lidhje me tenderin abuziv të 11 majit 2020 në lidhje me uniformat e policisë me vlerë 2.8 miliardë lekë, të akuzuar për shkelje të barazisë në tendera. SPAK ka përgjuar dhe vëzhguar 9 zyrtarët dhe ish-zyrtarët e Ministrisë së Brendshme, ndërsa kanë qenë bashkëpunëtorët e drejtësisë ata që kanë ‘zbërthyer’ skemën e abuzimit me tenderin. Ky tender është refuzuar të firmoset nga një anëtar i Komisionit dhe një anëtar i prokurimeve.