Mbi 200 persona kanë humbur jetën në Filipine pasi tajfuni i fuqishëm Rai goditi këtë shtet në Azinë juglindore. Zyrtarët thanë se 52 persona vazhdojnë të jenë të zhdukur, teksa tajfuni ka shkatërruar linjat e komunikimit në disa qytete dhe provinca të vendit. Sipas policisë kombëtare, të paktën 208 persona kanë vdekur dhe 239 janë lënduar. Numri i viktimave pritet të rritet pasi ekipet e shpëtimit po kanë vështirësi që të arrijnë në zonat e thella në Filipine. Mijëra policë, pjesëtarë të rojeve bregdetare dhe zjarrfikës janë dislokuar për të ndihmuar në përpjekjet për të shpëtuar qytetarët në zonat më të prekura nga tajfuni, ku njerëzit kanë mbetur pa ujë të pijshëm dhe ushqim. Kryqi i Kuq në Filipine ka raportuar për “shkatërrim të plotë” në zonat bregdetare pasi tajfuni Rai shkatërroi shtëpi, spitale dhe shkolla.