Pas lajmit se presidenti francez Emmaniel Macron rezultoi pozitiv me koronavirus, një sërë liderësh europianë, përfshirë kryeministrin spanjoll, Pedro Sanchez, deklaruan se do të vetë-izolohen. Sanchez tha se do të testohet menjëherë dhe do të respektojë karantinën deri në 24 dhjetor. Pas kontakteve me Macron, frika e infektimit rëndon edhe presidentin e Këshillit Europian, Charles Michel, sekretarin e pergjjithshem të OECD-së, Angel Gurria, kryeministrin portugez Antonio Costa, atë belg Alexander De Croo si dhe vetë shefin e ekzekutivit francez, Jean Castex. Njoftimin se Macron kishte rezultuar pozitiv e dha presidenca franceze e cila shpjegoi se lideri 42 vjecar kishte bërë një test pasi shfaqi simptoma të sëmundjes. Ai megjithatë, vazhdon të drejtojë vendin dhe do të punojë në distancë, tha një zyrtar I cituar nga BBC. Zonja e parë e Francës, Brigitte Macron, është izoluar edhe ajo, por thuhet se nuk ka simptoma. Kryeministri Castex u detyrua të ndërpriste një vizitë të planifikuar më vonë gjatë ditës në Senatin Francez ku do të paraqeste një strategji kombëtare të vaksinimit kundër koronavirusit. Franca këtë javë vendosi ndalimin e qarkullimit gjatë natës për të ndihmuar në parandalimin e përhapjes së koronavirusit. Ky vend ka shënuar dy milionë raste të konfirmuara që nga fillimi i pandemisë, me më shumë se 59.400 vdekje, sipas të dhënave të Universitetit Johns Hopkins.