Doha është tronditur nga një seri shpërthimesh të fuqishme pasi Forcat Ajrore të Izraelit ndërmorën një sulm ajror të paprecedentë ndaj një ndërtese në lagjen Katara, ku dyshohet se ndodheshin drejtues të lartë të Hamasit. Një zyrtar izraelit konfirmoi për mediat ndërkombëtare se operacioni, i kryer në bashkëpunim me agjencinë izraelite të inteligjencës Shin Bet, kishte për qëllim eliminimin e figurave kryesore të Hamasit të vendosur jashtë Gazës. Sipas tij, ky është një zhvillim strategjik në përpjekjet për të dobësuar strukturën drejtuese të organizatës islamike. Burime të ndryshme raportojnë se sulmi ndodhi në momentin kur zyrtarë të Hamasit po diskutonin një propozim për armëpushim në Gaza, të paraqitur më herët nga presidenti amerikan Donald Trump. Sipas dëshmitarëve okularë, në zonë u dëgjuan të paktën tetë shpërthime dhe mbi ndërtesat përreth u ngritën shtëllunga të mëdha tymi, duke shkaktuar panik mes banorëve të Dohas. Qeveria e Katarit reagoi ashpër, duke e quajtur sulmin izraelit "frikacak" dhe "një shkelje flagrante të ligjit ndërkombëtar", ndërsa njoftoi nisjen e një hetimi në nivelet më të larta shtetërore.