Dy shtetas kosovarë ndaj të cilëve kishte urdhërarrest ndërkombëtar janë ekstraduar nga Shqipëria në Kosovë. Lajmin e ka bërë të ditur policia e Kosovës, përmës një njftimi në rrjete sociale përmes të cilit sqaron se dy të dyshuarit ishin arrestuar nga autoritetet shqiptare, pasi kërkoheshin nga drejtësia kosovare për vepra penale të ndryshme, përfshirë “Grabitje” dhe “Vjedhje grabitqare” sipas ligjeve në Kosovë. Pas ekstradimit, ata janë dërguar në njësitet përkatëse të policisë për procedura të mëtejshme ligjore. Në njoftim thuhet se ekstradimi është realizuar përmes pikës kufitare Vërmicë, në bashkëpunim mes Drejtorisë për Bashkëpunim Ndërkombëtar Policor, institucioneve të drejtësisë dhe njësive tjera relevante të Policisë së Kosovës. Policia e Kosovës thekson se do të vazhdojë shkëmbimin e informacioneve me institucionet vendore, shtetet dhe organizatat ndërkombëtare, me qëllim parandalimin, hetimin dhe zbulimin e aktiviteteve kriminale, si dhe gjurmimin e grupeve dhe individëve që veprojnë brenda dhe jashtë vendit.