Suedia do të forcojë mbrojtjen e Polonisë duke dërguar sisteme të mbrojtjes ajrore Patriot dhe rreth 100 trupa ushtarake në qendrën strategjike logjistike Rzeszów-Jasionka. Misioni suedez do të nisë më 1 dhjetor dhe do të zgjasë shtatë muaj. Trupat suedeze do të marrin përsipër detyrat që deri tani kryheshin nga Holanda dhe do të angazhohen në mbrojtjen e aeroportit dhe zonës përreth nga kërcënimet ajrore, përfshirë dronët dhe raketat. Vendimi u njoftua nga kryeministri suedez Ulf Kristersson. Komandantja e Regjimentit Suedez të Mbrojtjes Ajrore, kolonelja Sofia Westermark, e cilësoi operacionin si një nga misionet më komplekse të ndërmarra nga Suedia që prej anëtarësimit në NATO. Rzeszów-Jasionka ka një rëndësi të veçantë për mbështetjen ndaj Ukrainës. Përmes këtij aeroporti kalojnë sasi të mëdha pajisjesh ushtarake dhe ndihmash të tjera të destinuara për Ukrainën. Sipas autoriteteve suedeze, rreth 18 mijë tonë pajisje kalojnë çdo muaj përmes këtij hub-i, ndërsa më shumë se 80 për qind e ndihmës ushtarake për Ukrainën kalon përmes territorit polak.