LLava e dalë nga krateri i vullkanit Cumbre Vieja në ishullin Las Palmas, që nisi shpërthimet që nga e diela e shkuar, ka shkatërruar 589 shtëpi dhe 21 kilometra rrugë, duke mbuluar edhe 258 hektarë tokë. Këto janë të dhënat më të fundit të publikuara nga sistemi evropian Copernicus. 76 ndërtesa janë shkatërruar vetëm në 24 orët e fundit. Pasi mëngjesin e të hënës vullkani dukej sikur ishte përgjumur, afër mbrëmjes ai rifilloi të lëshonte llavë në mënyrë intensive. Një sjellje që ekspertët e konsiderojnë normale. Sipas të dhënave të fundit të disponueshme, një nga rrjedhat e llavës së vullkanit ka mbërritur tani deri në largësinë e 800 metrave nga deti. Agjencia e lajmeve Efe, shkruan se llava ka mbërritur tashmë në portat e bashkisë Tazacorte pasi gjatë ditëve të shkuara kishte varrosur nën të lokalitetin Todoque. Sjellja pak e parashikueshme e vullkanit e ka lënë ndërkohë popullatën në frikë konstante se shtëpitë e tyre mund të arrihen nga llava.