Ka ndërruar jetë në moshën 89-vjeçare regjisori i madh shqiptar, Dhimitër Anagnosti, një nga figurat më të rëndësishme të kinematografisë kombëtare. Lajmin e hidhur e ka bërë të ditur vajza e tij, Juna Anagnosti, përmes një postimi prekës në rrjetet sociale: “Lamtumirë Dhimitër Anagnosti, regjisori i jetes sone! Pas nje lëngimi te gjate ju binde ligjit te jetes! Lamtumirë babush!”, ka shkruar ajo. Sipas amanetit të tij, Anagnosti do të prehet në vendlindjen e tij, në Vuno të Himarës. Me një karrierë mbi katër dekada, ai ka realizuar 14 filma artistikë dhe 10 dokumentarë. Ndër ta kujtohen “Lulëkuqet mbi mure”, “Përrallë nga e kaluara”, “Gjoleka, djali i Abazit” dhe të tjerë. Krahas kinemasë, ai ushtroi pasionin për letërsinë, duke botuar romanin “Koburja nga Europa” dhe librin “Ulliri, pema e dhembjes”. Veprimtaria e tij u vlerësua me disa nga titujt më të lartë si “Artist i Popullit”, “Nderi i Kombit” dhe “Gjergj Kastrioti Skënderbeu”, duke kurorëzuar një jetë të përkushtuar ndaj artit, kulturës dhe qytetarisë. Në fillim të viteve '90, Dhimitër Anagnosti shërbeu si deputet dhe ministër i Kulturës, Rinisë dhe Sporteve. Ai ishte i martuar me aktoren e mirënjohur Roza Anagnosti, me të cilën ndau jetën dhe artin.