Kompania turke Kurum u ka njoftuar punonjësve të saj mbylljen e aktivitetit të prodhimit të çelikut në kombinatin metalurgjik të Elbasanit. Vetë kompania nuk ka dalë me një njoftim zyrtar, por burimet pohojnë se gati 500 punëtorë të uzinës së çelikut dhe të petëzimit janë njoftuar për pezullimin e njëanshëm të kontratës, pa u dhënë shpjegime për këtë vendim. Nga data 1 gusht, punonjësit e uzinës thonë se u mbyll uzina e çelikut dhe prej datës 20 gusht është mbyllur edhe uzina petëzimit. Kompania thotë se punonjësit që preken nga pezullimi i aktivitetit do të paguhen edhe tre muaj të tjerë. Në lidhje me njoftimet publike për ndërprerje të kontratës të punës për 500 punonjës, ka reaguar edhe Konfederata e Sindikatave denoncon ato që i quan tentativa të Kurum për të biseduar me drejtues apo grupime punonjësish pa legjitimitetin e duhur ligjor dhe pa përfaqësimin ligjor në strukturat sindikale, vendore apo kombëtare. KSSH kujton se kjo nuk është hera e parë që Kurum kërcënon punonjësit, duke sjellë në vëmendje rastet në 2002, 2008 dhe në 2016-n, kur shpalli falimentin. Sipas Konfederatës, gjendja e Kurum sot është produkt i paaftësisë dhe dështimit të saj për t’iu përshtatur tregut botëror dhe konkurruar ndërkombëtarisht.