Në një ceremoni shtetërore, kryeministri i ri i Kosovës, Albin Kurti mori detyrën e re të cilën ia dorëzoi kryeministri i deritanishëm i Kosovës, Avdullah Hoti. Qeveria e Albin Kurtit, mori një ditë më parë besimin e 67 deputetëve të Kuvendit të Kosovës dhe e krijoi ekzekutivin e ri me partitë e komuniteteve jo serbe. Qeveria e tij ka tre zëvendëskryeministra dhe 15 ministri, pesë prej të cilave do të udhëhiqen nga gra. Menaxhimi i pandemisë dhe ringjallja e ekonomisë u theksuan si sfidat kryesore nga kryeministri i ri i Kosovës në mbledhjen ceremoniale të kabinetit të ri. Kurti tha se duhet të ulen rastet me koronavirus e të eliminohen vdekjet. “......Sfidat janë të mëdha. Përtej veprimeve urgjente në menaxhimin e pandemisë, duhet të veprojmë shpejt që të ndalim humbjet financiare nga kompanitë publike, por edhe të ndalim recesionin ekonomik, duke ndihmuar sektorin privat që të shpëtojmë vendet e punës dhe prodhimin. Pres që në tavolinën time të vijë urgjent, si plani për menaxhimin e pandemisë, po ashtu edhe plani për ringjalljen ekonomike” Kurti po ashtu tha se në ndërmarrjet publike do të bëhet auditim, për të parë performancën e tyre dhe nëse zbulohen afera, atëherë do të ndërhyhet. Edhe gjatë paraqitjes së ekspozesë para Kuvendit të Kosovës, Kurti vlerësoi se pandemia mbetet sfida kryesore. Ai ka thënë se synon të sigurojë vaksina kundër koronavirusit për të imunizuar 60 për qind të popullatës. Kosova është vendi i vetëm në Evropë që nuk ka nisur fushatën e imunizimit kundër koronavirusit.