Kryeministri i Kosovës, Albin Kurti i është përgjigjur deklaratave të shefit për politikë të jashtme të BE-së Josep Borrell pasi ky i fundit tha se ndihet i alarmuar për arrestimet e serbëve në veri dhe për marshimin e ushtrisë në Mitrovicën e Jugut. Sipas Kurtit, ky është “dezinformimi i rrezikshëm dhe i papranueshëm” që ndez tensionet dhe nuk i shërben qetësimit të situatës në veri. Ai thotë se stërvitja e FSK-së është një aktivitet rutinë, i planifikuar çdo vit, dhe për këtë është në dijeni të plotë edhe KFOR. Më tej Kurti thotë se bazuar në prova, personat serbë të arrestuar, janë vënë në pranga si përgjegjës për sulmin ndaj ushtarëve të KFOR në Zveçan më 29 maj. Në një tjetër deklaratë, Ministri i Punëve të Brendshme të Kosovës, Xhelal Sveçla deklaroi se policia ka parandaluar një sulm terrorist në veri të vendit. Përmes një postimi në rrjetet sociale, Sveçla u shpreh se është identifikuar një automjet me targa të Beogradit, rreth 100m larg Komunës së Zveçanit, në të cilën janë zbuluar sasi të mëdha të armatimeve, mjeteve eksplozive dhe municioneve të ndryshme. Sipas tij, të gjitha këto mjete kishin për qëllim dhe shërbejnë për realizim të sulmeve terroriste ndaj qytetarëve dhe Institucioneve të Republikës së Kosovës.