Policia e Durrësit njoftoi arrestimin e ish kreut të inspektoratit bashkiak të mbrojtjes së territorit, pasi akuzohet se duke shfrytëzuar këtë post ka ndërtuar pa leje në fshatin Shetaj të njësisë së Ishmit. Në pranga është vendosur 55 vjeçari Ardian Halili. Ai dyshohet se në vitin 2017, kohë kur mbante detyrën e kryeinspektorit në inspektoratin vendor të mbrojtjes së territorit ka ndërtuar vetë disa shtëpi pushimi pa leje në fshatin Shetaj. Halili, që vetë banon në Tiranë është përfolur edhe për korrupsion në sistemin e drejtësisë, ku dyshohet se bënte ndërmjetësin në dosje të caktuara duke shfrytëzuar postin e bashkëshortes si prokurore në Durrës. Ardian Halili ka mbajtur postin e kryeinspektorit urbanistik në Bashkinë e Durrësit nga viti 2017 deri në vitin 2021 dhe një prej shkeljeve të para që dyshohet se ka kryer në këtë post ka qenë lejimi i ndërtimeve pa leje për veten. Rasti i tij është zbuluar vetëm tani me nisjen e operacionit kundër ndërtimeve pa leje dhe për lirimin e hapësirave publike.