Një përplasje me armë zjarri ka ndodhur mëngjesin e sotëm në qendër të Triestes, në Itali dhe sipas mediave italiane, tetë persona janë plagosur në ngjarjen e ndodhur pranë një lokali. Mediat italiane raportojnë se ngjarja ka ndodhur për shkak të mosmarrëveshjeve mes grupeve të punëtorëve të huaj, e disa prej tyre shkruajnë se bëhet fjalë për kosovarë dhe shqiptarë. Sipas disa burimeve të shtënat erdhën si rezultat i mosmarrëveshjeve pikërisht për çështjet e punësimit. Gjithçka nisi me një zënkë të vogël, dhe më pas sulmuan njëri-tjetrin me hekura dhe atëherë dikush nxorri armën dhe qëlloi disa herë. Mësohet se njëri prej personave të plagosur është në gjendje të rëndë. Zona u mbyll nga policia, ndërkohë që në vendngjarje janë policia, karabinierët, policia financiare dhe ambulanca. Hetuesit kanë marrë tani në dorë situatën ndërsa kanë nisur operacione kërkimi në zonën përreth qytetit. Në ngjarje, raportohet se janë përfshirë disa persona. Baristi në lokalin para të cilit u zhvillua ngjarja ka treguar për policinë se kishte dëgjuar një potere të madhe por në momentet e para nuk kishte kuptuar se cfarë po ndodhte. Ai madje kishte menduar se personat që po konfrontoheshin, po luanin mes tyre. më pas, kishte parë një person në tokë dhe atëherë kishte kuptuar se cfarë po ndodhte.