Policia e Shtetit njoftoi arrestimin e një 41 vjeçari të kërkuar nga drejtësia italiane si organizatori i një grupi kriminal që trafikoi sasi të konsiderueshme droge përgjatë viteve 2020-2021 në Itali dhe Zvicër. I arrestuar ësthë shtetasi Edi Hoxha, njohur edhe me emrin Edison Hoxha. Policia njofton se ai u kap në kuadër të operacionit Fingerprint si rezultat i bashkëpunimit disamujor me antimafian italiane të Firences. Në kudër të këtij operacioni, gjykata e Firences ka lëshuar 12 urdhër-arreste, pjesë më e madhe e të cilave për shtetas shqiptarë. Nga këta, 9 urdhër arreste janë ekzekutuar në Itali, një në Shqipëri, ndërsa dy shtetas të tjerë janë shpallur në kërkim. Gjykata e Firences ka caktuar ndaj tyre masën e sigurisë “Arrest në burg”, për trafikim të lëndëve narkotike, kryer në kuadër të organizatës kriminale. 41 vjeçari Edison Hoxha akuzohet se ka koordinuar veprimtarinë kriminale, ku autoritetet italiane thonë se është provuar trafikimi i kokainës dhe hashashit në drejtim të Italisë dhe Zvicrës.