Ministria e Mjedisit dhe ajo e Infrastrukturës dhe Energjisë kanë dalë me një deklaratë të përbashkët, ku thonë se dy ngarkesat, ajo e bllokuar në Kinë dhe tjetra me destinacion Tajlandën, por e ndaluar. Në deklaratën e përbashkët dy dikasteret që kanë përgjegjësi direkte mbi këtë sektor akuzojnë mediat për fabrikime akuzash. Sipas ministrive, në të dyja rastet lënda ka kaluar pa probleme kontrollet në vendet e Bashkimit Europian. ‘Në të dyja rastet e përfolura të transportit, nga Elbasani drejt Tajlandës dhe nga Kosova drejt Kinës, mallrat e deklaruara si okside/hidrokside hekuri apo koncentrat zinku, janë transportuar nga Porti i Durrësit drejt porteve evropiane përmes linjave kontejnerike ndërkombëtare me reputacion të padyshimtë dhe nuk janë bërë objekte kontrollesh në vendet e BE-së, ku kanë ndaluar dhe janë magazinuar përkohësisht, por janë lejuar të vijojnë itinerarin e tyre’, thuhet në deklaratë. Nga verifikimet e të dyja proceseve logjistike të mësipërme, vijon deklarata, si dhe të ngarkesave të ngjashme në të kaluarën, mallra me klasifikim të tillë nuk janë konsideruar asnjëherë si mbetje të rrezikshme nga organet doganore dhe mjedisore. E njëjta gjë, thuhet në deklaratë, vlen edhe në vlerësimin e autoriteteve portuale shqiptare, që nuk kanë kategorizuar këto dy ngarkesa si mallra të rrezikshme. ‘Faktet tregojnë se ngarkesa të tilla janë pranuar rregullisht nga vendet tranzit dhe nga vendet e destinacionit fundor. Më konkretisht rezulton se së fundmi 360 njësi kontejnerike të tilla janë pranuar nga autoritetet doganore kineze vetëm në 10 muajt e fundit’, shtojnë dy ministritë në deklaratën e përbashkët.