Ligjvënësit amerikanë u rikthyen në Capitol për të vulosur certifikimin e fitores së Joe Biden në zgjedhjet presidenciale të 3 nëntorit, disa orë pasi mbështetës të presidentit Donald Trump mësynë ndërtesën. Seanca u rihap nga zëvendëspresidenti Mike Pence, i cili e dënoi episodin që shkaktoi indinjatë brenda kufijve amerikanë, e jashtë tyre. “Kjo e sotmja ishte një ditë e errët në historinë e Capitolit të Shteteve te Bashkuara të Amerikës. Por falë lëvizjeve të shpejta të policisë së tij, dhe forcave federale, shtetërorë dhe lokale ligjzbatuese, dhuna u fashit. Kapitoli është i sigurtë dhe puna e tij do të vazhdojë. Ne e dënojmë dhunën në mënyrën më të fortë të mundshme. Ne pikëllohemi për humbjen e jetës në këto salla të shenjta, dhe lëndimet e pësuara nga ata që mbrojtën Kapitolin tonë sot”. Pas disa fjalimeve të anëtarëve të tij, Senati amerikan hodhi poshtë me shumicë dërrmuese një lëvizje nga aleatët e Presidentit Donald Trump për të kundërshtuar certifikimin e rezultateve të zgjedhjeve presidenciale për shtetin e Arizonës që i dha fitoren demokratit Joe Biden. Si demokratët edhe republikanët dënuan dhunën në Kongres por ndërsa demokratët fajësuar Presidentin Trump për nxitjen e saj, shumica e republikanëve nuk e përmendën atë. “Dhuna nuk fiton kurrë. Liria fiton, dhe kjo është ende shtëpia e popullit. Ndërsa rimblidhemi në këtë dhomë, bota do të jetë përsëri dëshmitare e rezistencës dhe forcës së demokracisë sonë”, tha Pence. Kreu i Republikanëve në Senat Mitch McConnell tha se “ne do të kryejmë detyrën tonë sipas Kushtetutës për kombin tonë.” Ndërsa lideri demokrat i senatit, Chuck Schumer e hodhi përgjegjësinë mbi presidentin Trump, duke thënë se kjo do të jetë një njollë mbi vendin tonë jo aq lehtë për t’u zhdukur. New York Post shkruante se Trump tani mund të shkarkohet, duke cituar amendamentin e 25-të që parashikon largimin e presidentit “ nëse nuk është në gjendje të përmbushë detyrat e tij.