Jo të gjithë të majtët mbështesin ndarjen e re të komisioneve parlamentare. Erion Braçe nuk e votoi këtë propozim të Partisë Socialiste. Kjo për shkak se puna e vrullshme për hartimin e një strategjie kundër dezinformimit, e cila u drejtua prej tij, ngeli përgjysëm dhe nuk u përkthye në krijimin e një komisioni parlamentar, sikurse ishte parashikuar më herët. Braçe: “U mor me vrull të madh, u thirra unë, duhet ta bësh ti këtë gjë se ti di ta bësh. Pastaj as ndihmoi kush, as foli kush, as e lexoi kush dhe as e vlerësoi kush punën që u bë dhe dokumentin që u miratua. Por në udhërrëfyesin që shoqëron dokumentin, thuhet qartë dhe është votuar në Kuvend që do të ketë një komision parlamentar pikërisht për këtë çështje. Tani që gjithë puna e bërë, dokumenti po vlejnë si shembull edhe për vende rreth e qark nesh, tani zhduket propozimi, zhduket komisioni.” Socialisti Erion Braçe i konsideron 11 komisionet e reja parlamentare të personalizuara dhe klienteliste.