Tre raste asimptomatike me covid 19 në qytet e kjo ka mjaftuar që autoritetet kineze të vendosin në izolim të gjithë banorët e Youzhou-t, mbi një milionë persona. Olimpiada dimërore e pekinit po afrohet dhe qeveria kineze ka shtuar kufizimet duke u mbështetur tek strategjia e saj e konsoliduar tashmë ‘Zero Covid’. Youzhou ndodhet në provincën e Henanit, 800 km në jug të Pekinit. Nga kryeqyteti që do të presë nga 4 deri më 20 shkurt lojërat olimpike dimërore të radhës, ka një distancë të konsiderueshme por jo të mjaftueshme për qeverinë kineze e cila ka rritur vigjilencën në nivelet maksimale. E në këtë kuadër është marrë edhe vendimi për të detyruar 1.2 milionë njerëz të mos dalin nga shtëpitë, pa dhënë informacione të mëtejshme për kohëzgjatjen e izolimit. Në qytet, ishte pezulluar më herët transporti publik ndërsa qendrat tregtare, muzetë dhe atraksionet turistike ishin mbyllur. Tani do të vendosen edhe barriera për të aplikuar në mënyrë rigoroze masat parandaluese – kanë paralajmëruar autoritetet e qytetit. Kur ka mbetur vetëm një muaj nga olimpiada, kina ka regjistruar në 24 orët e shkuara 175 raste të reja me covid.