Tajvani tha se Kina ka shkelur hapësirën ajrore të rajonit. Ministria e Mbrojtjes tha se 19 aeroplanë kinezë, përfshirë disa syresh të pajisur me armë bërthamore kanë hyrë në zonën e tij të mbrojtjes ajrore. Incidenti ka ndodhur më 5 shtator. Kjo nuk është hera e parë që Kina shkel hapësirën ajrore të Tajvanit. Ka një vit që rajoni ka ngritur shqetësime për aktivitetet ushtarake kineze në afërsi të ishullit. Tajvani është një rajon demokratik dhe thotë se është i pavarur, por Kina e sheh si një provincë të saj të shkëputur. Ministria e Mbrojtjes e Tajvanit tha se misioni i së dielës nga forcat ajrore kineze përfshiu katër bombardues H-6, të cilët mund të mbajnë armë bërthamore, si dhe një aeroplan anti-nëndetëse. Me zonën e mbrojtjes ajrore nënkuptohet zona jashtë territorit të një vendi dhe hapësirës ajrore kombëtare. Mirëpo, në këtë zonë, për shkak të interesit të sigurisë kombëtare, monitorohen dhe kontrollohen fluturimet e aeroplanëve të huaj. Tajvani me të vërejtur aktivitetin kinez ka dërguar aeroplanët luftarakë për të paralajmëruar avionët kinezë. Kina ende nuk e ka komentuar incidentin. Pekini shpesh ndërmerr misione të tilla për të shprehur pakënaqësinë ndaj deklaratave të bëra nga Tajvani. Në qershor, dërgoi 28 avionë ushtarakë, ndërsa më 24 janar, 15 avionë hynë në zonën e mbrojtjes ajrore të Tajvanit. Një incident i ngjashëm u shënua edhe më 12 prill. Nuk është e qartë se çfarë e nxiti Kinën të ndërmarrë veprimin e fundit. Megjithatë, javën e kaluar Ministria e Mbrojtjes e Tajvanit paralajmëroi se kërcënimi kinez po rritet.