Pas disa dështimeve të Presidencës gjermane të BE-së që të miratojë një varg vendimesh për zgjerimin, pritet të miratohen sot së paku Konkluzionet e Këshillit Evropian, kushtuar këtij procesi. Por, për shkak të kundërshtimit të Bullgarisë, nuk pritet të kalojë vendimi për miratimin e Kornizës negociuese me Maqedoninë e Veriut. Si pasojë e kësaj, disa shtete kanë kundërshtuar që të miratohet korniza e ngjashme edhe me Shqipërinë. Rrjedhimisht, sot pritet vetëm miratimi me procedurë të shkurtuar i Konkluzioneve kushtuar zgjerimit të BE-së dhe procesit të stabilizim-asociimit. Në to pritet të përseritet thirrja për rritjen e përpjekjeve në procesin e reformave në rajon, sidomos në reformat në sistemin e drejtësisë, luftën kundër krimit të organizuar dhe korrupsionit, si dhe në reformat e nevojshme për zhvillimin ekonomik. BE-ja, përmes këtyre Konkluzioneve, pritet t’iu bëjë thirrje vendeve të rajonit të Ballkanit që t’i zgjidhin mospajtimet e tyre bilaterale me fqinjët, përfshirë mosmarrëveshjet rreth kufijve. Një thirrje e veçantë do të bëhet për përmbajtje nga deklaratat nxitëse dhe për më shumë punë drejt pajtimit dhe bashkëpunimit. BE-ja, përmes këtyre Konkluzioneve, do të përsërisë kundërshtimin ndaj glorifikimit të kriminelëve të luftës, si dhe ftesën që të dënohen të gjitha krimet e luftës, pa marrë parasysh se nga cila palë vijnë kryesit e krimeve të tilla. Edhe miratimi i këtyre Konkluzioneve ka qenë i bllokuar për shkak se Bullgaria kërkonte që në to të kritikohet Maqedonia e Veriut për atë që Bullgaria e cilëson si “keqinterpretim të historisë”. Këto konkluzione, në Këshillin e BE-së miratohen me pajtimin e të gjitha shteteve anëtare.