Presioni për dorëheqje ndaj Kryeministrit britanik, Boris Johnson është shumëfishuar pasi ky i fundit ka pranuar për herë të parë se ka marrë pjesë në një festë me stafin e qeverisë në fillim të pandemisë dhe kur masat shtrënguese ndalonin grumbullimet. Duke folur para deputetëve, Johnson kërkoi ndjesë për shkeljen e rregullave anti-Covid, por tha se kishte shkuar me besimin se ishte një takim pune. Lideri laburist, Keir Starmer i kërkoi Kryeministrit të jepte dorëheqjen, duke e quajtur arsyetimin e tij një "spektakël patetik të një njeriu që s’i ka mbetur rrugë tjetër veç largimit". Udhëheqësi konservator skocez, Douglas Ross thotë gjithashtu se pozicioni i Kryeministrit nuk është më i qëndrueshëm dhe Johnson duhet të japë dorëheqjen Starmer dhe deputetë të tjerë pyetën se si Johnson mund të kishte menduar se festa ishte një ngjarje pune. Dëshmitarët thanë se Kryeministri dhe gruaja e tij ishin në mesin e rreth 30 personave në ngjarjen në maj 2020 - në kohën kur ishte e ndaluar të takohesh me më shumë se një person jashtë. Ndërkohë, qeveria britanike thotë se është në pritje të rezultateve të një hetimi të nisur nga policia.