Vetëm disa muaj përpara se të bëhej kancelar i Austrisë të hënën, Christian Stocker ishte një funksionar partie pa përvojë ministrore, që i afrohej me shpejtësi moshës së pensionit dhe pak i njohur jashtë flluskës politike. Por pesë muajt e bisedimeve më kaotike për krijimin e një koalicioni qeverisës në historinë e pasluftës në vend, pas një zgjedhjeje jo përfundimtare në shtator, kulmuan me betimin e 64-vjeëarit si kreu i qeverisë. "Kancelari i panjohur", ishte titulli i vendosur nga tabloidi austriak Kronen Zeitung mbi një profil të Stocker.Kur fillimisht Partia e tij Popullore konservatore, OVP, e më pas edhe Partia e Lirisë së ekstremit të djathtë, FPO, e humbën mundësinë e tyre për të udhëhequr një qeveri, Stocker u ngjit në pozitën drejtuese, duke ndërmjetësuar një marrëveshje koalicioni centrist ku paraardhësi i tij kishte dështuar. Një avokat pragmatik, që flet qartë, Stocker ka kërkuar të mbajë Austrinë gjithnjë e më të prirur nga e djathta, në mënyrë të vendosur brenda Bashkimit Evropian dhe kritik ndaj Rusisë, ndryshe nga kreu i FPO-së Herbert Kickl, i cili tani mbetet në opozitë.