Kamerat e sigurisë në zonën ku ka ndodhur vrasja kanë filmuar autorët që ekzekutuan Gentian Qarrin ditën e shtunë në Vlorë. E megjithatë, edhe për faktin se pamjet ne video nuk janë mjaftueshëm të qarta për ta indektifikuar autorin, ato do jenë një ndihmesë e rëndësishme për të mundësuar identifikimin e autorëve. Sakaq sipas grupit hetimor pista kryesore mbetet ajo e pazareve të drogës. Ngjarja e rëndë ka ndodhur rreth orës 18:16 të së shtunës, në lagjen “29 Nëntori”, në afërsi të Bibliotekës të qytetit. Viktima ishte duke ecur në këmbë, ndërkohë që nga një automjet me dy persona të kamufluar brenda është qëlluar me breshëri plumbash, mbi 20 herë duke e lënë fillimisht të plagosur. Gentian Qarri është qëlluar në gjymtyrët e poshtëm dhe në gjoks ku si pasojë e plagëve të marra ka ndërruar jetë në spitalin e Vlorës. Ai sapo kishte dalë nga banesa e tij në momentin ku dy persona nga një makinë kanë qëlluar në drejtim të tij me breshëri kallashnikovi. Autorët e kamufluar dyshohet se janë larguar në drejtim të Pyllit të Sodës, ku është gjetur një makinë e djegur tip "Toyota Yaris" që dyshohet se është e tyre dhe prej andej lajnë larguar me një makinë tjetër. Mësohet se viktima kishte qenë i dënuar me 11 vite burg për drogë në Itali. Ai kishte 3 vite që kishte përfunduar dënimin dhe ishte kthyer në Vlorë, ku ishte martuar dhe punonte si hidraulik. Për shkak të dënimit me drogë pista e hetimit është përqendruar tek larja e hesapeve.