Udhëheqësit evropianë duhet të mos lejojnë një “kapitullim" të Ukrainës përballë Rusisë, tha të mërkurën kryeministri polak Donald Tusk, përpara një takimi virtual të liderëve të BE-së për të diskutuar për luftën, pas përpjekjeve të Presidentit amerikan Donald Trump për të arritur një marrëveshje me Moskën. “Ne nuk mund të pajtohemi me kapitullimin e Ukrainës ndaj kërkesave të paturpshme të Rusisë, duke përfshirë edhe ato territoriale”, tha Tusk në një video të postuar në X. Anëtarët e Këshillit të BE-së do të dëgjojnë një përmbledhje nga presidenti francez Emmanuel Macron të vizitës së tij këtë javë në Uashington, ku ai u takua me Trump. Macron dhe Trump shfaqën dallime të dukshme të hënën në qasjen e tyre ndaj Ukrainës, duke ekspozuar një ndarje midis Shteteve të Bashkuara dhe Evropës mbi ofertën e Trump për një marrëveshje të shpejtë armëpushimi me Rusinë. “Ne të gjithë shpresojmë për një fund të shpejtë të luftës dhe Evropa dëshiron të ketë pozicionin më të qartë të mundshëm”, tha Tusk. Ai shtoi se ndërsa Polonia nuk do të dërgonte ushtarë në një mision paqeruajtës të ardhshëm në Ukrainë, ajo ishte e gatshme të ofrojë çdo ndihmë logjistike "edhe në një shkallë më të madhe, nëse ka një nevojë të tillë".