Italia ka vendosur nën kufizime të ashpra të pavaksinuarit ndërsa festat e fundvitit po afrojnë, duke i përjashtuar ata nga restorantet, teatrot dhe muzetë për të reduktuar përhapjen e koronavirusit dhe për të inkurajuar skeptikët ndaj vaksinave të marrin dozat e tyre. vetëm ata që kanë super-greenpass, që kërkon që italianët të marrin të dyja dozat, dhe jo thjeshtë të paraqesin rezultat negativ testi, do të mund të marrin pjesë plotësisht në jetën publike duke filluar nga kjo e hënë. Policia italiane do të kontrollojë nëse ata që vizitojnë ambjentet e brendshme të restoranteve, bareve, koncerteve, eventeve sportive etj, kanë super green pas. Kufizimet pasojnë një rritje të ndjeshme të infektimeve të reja në itali në gjashtë javët e shkuara, me mbi 15 mijë raste të reja të regjistruara vetëm të dielën dhe një shqetësim për mënyrën se si varianti i ri Omicron që besohet se është më i transmetueshëm se Delta, po përhapet. Edhe në vende të tjera të evropës liderët kanë nxituar të marrin masa të reja dhe ndalimet e udhëtimeve në mesin e panikut mbi rritjen e rasteve dhe ardhjen e variantit omicron po shtrëngohen. Gjermania ka njoftuar se do të izolojë të pavaksinuarit dhe do ti ndalojë ata në hapësirat publike në prag të krishtlindjes ndërsa në francë, qytetarët duhet të tregojnë provë vaksinimi për një pasaportë të vlefshme covidi që i lejon të hyjnë në vendet publike.