Italia ka ndaluar një ngarkesë me vaksina të Oxfordit dhe Astrazenekas, që kishin si destinacion Australinë. Kjo vjen pasi bashkimi evropian miratoi rregulla të reja për ngarkesat me vaksina që do të dilnin jashtë bllokut, edhe pse kjo e Italisë ishte e para ndërhyrje e këtij lloji. Roma ndaloi eksportin e 350 mijë dozave të vaksinës, thanë zyrtarët, me italinë që njoftoi Brukselin për vendimin në fund të javës së shkuar. Komisioni evropian, sipas zyrtarëve, nuk e ka kundërshtuar vendimin. Lëvizja sidoqoftë kërcënon të rrisë tensionet globale në lidhje me prokurimin e vaksinave, pasi aleatët e BE kanë kundërshtuar vendosjen e regjimit të ri për eksportet. Sistemi u njoftua nga komisioni evropian në fund të janarit dhe sipas tij, prodhuesit e vaksinave me bazë në BE duhet të kërkojnë autorizimin e qeverive të tyre kombëtare, pra të vendit ku vaksina anti covid prodhohet, para se ta eksportojnë atë jashtë BE-së.