Garda Revolucionare e Iranit kërcënoi të dielën me përgjigje "vendimtare" ndaj çdo sulmi, pasi Presidenti i SHBA Donald Trump urdhëroi një valë sulmesh ajrore kundër rebelëve Huthi të Jemenit dhe paralajmëroi Teheranin të ndalonte mbështetjen e grupit. Të shtunën, Trump tha se Shtetet e Bashkuara kishin nisur "aksionin ushtarak vendimtar dhe të fuqishëm" për t'i dhënë fund kërcënimit Huthi ndaj anijeve në Detin e Kuq dhe paralajmëroi se mbështetja e Iranit për rebelët "duhet të përfundojë menjëherë". Një zyrtar shëndetësor i lëvizjes Huthi tha se sulmet kishin vrarë 31 njerëz. Shefi i Gardës iraniane Hossein Salami denoncoi kërcënimet e Trumpit në një fjalim të dielën, duke shtuar se "Irani nuk do të bëjë luftë, por nëse dikush kërcënon, ai do të japë përgjigjet e duhura, vendimtare dhe përfundimtare". Komandanti i quajti Huthit "përfaqësues të Jemenasve", duke shtuar se grupi i mori "vendimet strategjike dhe operacionale" në mënyrë të pavarur. Në janar 2020, gjatë mandatit të parë të Trump, SHBA vrau komandantin e operacioneve të jashtme të Gardës, Qassem Soleimani, në një sulm me dron në Bagdad. Ditë më vonë, Irani u hakmor duke lëshuar raketa në bazat në Irak ku strehoheshin trupat amerikane dhe ato të koalicionit. Asnjë ushtar amerikan nuk u vra, por Uashingtoni tha se dhjetëra trupa pësuan lëndime traumatike.