Sipas kërkesës publike të kryeministrit Edi Rama, po vijon faza e dytë e testimit të burimeve njerëzore të Autoritetit Kombëtar të Ushqimit. 275 inspektorë po vlerësohen nga një komision i posaçëm i përbërë nga tre pedagogë të universitetit bujqësor të Tiranës dhe dy përfaqësues të Ministrisë së Bujqësisë. Ligji për inspektoriatet, që ka hyrë në fuqi prej muajit maj parashikon unifikimin e AKU-së, Autoritetit Kombëtar të Veterinarisë dhe Mbrojtjes së Bimëve dhe Akuakulturës në një drejtori të vetme inspektimi pranë Ministrisë së Bujqësisë, ku do të angazhohen inspektorët e AKU-së në bazë të rezultateve të testimeve dhe intervistave individuale që do të vijojnë deri më pesë shtator. Ndërkohë, Ministria e Bujqësisë ka hedhur për konsultim publik një kuadër të ri ligjor për kontrollin e sigurisë ushqimore, masat mbrojtëse kundër dëmtimit të bimëve dhe ushqimet për kafshët. Ekspertët e sigurisë ushqimore shohin me shqetësim një nen të këtij drafti që ka të bëjë me delegimin e detyrave të kontrollit zyrtar nga Institucioni Përgjegjës për Kontrollet Zyrtare. Parashikohet që kontrolli i sigurisë ushqimore mund t’i kalojë kompanive private, të cilat plotësojnë disa kushte ligjore. “Personi fizik duhet të ketë aftësitë, pajisjet dhe infrastrukturën e nevojshme për të kryer detyrat e kontrollit zyrtar që i janë deleguar, kualifikim dhe përvojë të përshtatshme si dhe të jetë i drejtë, i paanshëm dhe nuk pa asnjë konflikt interesi për kryerjen e detyrave të kontrollit zyrtar që i janë deleguar” – thuhet në draft. Ekspertët e sigurisë ushqimor ngrenë shqetësimin se garantimi i sigurisë ushqimore i shtetit nuk mund të privatizohet, por duhet të jetë vetëm në kompetencë të institucioneve shqiptare.