Inflacioni u ngadalësua ndjeshëm në muajin mars, por i ndarë sipas grupeve rritja e çmimeve të ushqimeve vijoi me ritme të larta edhe për këtë muaj. Sipas të dhënave të INSTAT, inflacioni i përgjithshëm në mars ishte 5.3 për qind, në të njëjtin nivel si marsi i vitit të kaluar, kur sapo kishte shpërthyer lufta në Ukraina dhe efektet e saj në zinxhirin global të tregtisë sapo kishin nisur. Kontributin më të madh në rënien e inflacionit në mars e ka dhënë transporti, si reflektim i uljes së çmimit të karburanteve në tregjet ndërkombëtare, që u reflektuan edhe në Shqipëri. Në transport, çmimet ranë me 7.5 për qind, por në grupin e ushqimeve ato u rritën me 11 për qind. Brenda grupit të ushqimeve çmimet e qumështit, djathit dhe vezës u rritën me me 20,6 për qind, pasuar nga peshku me gati 16 për qind dhe më pas zarzavatet e patatet me 13.6 për qind.