Qeveria ka nxjerrë vendimin për indeksimin e vjeshtës të pensioneve, ku sipas përllogaritjeve në bazë të indeksit të çmimeve të konsumit të shortës së mallrave dhe shërbimeve për pensionistët është llogaritur në 2.5 për qind rritje. Vendimi është miratuar nga qeveria pasi ka marrë miratimin nga Këshilli Administrativ i Institutit të Sigurimeve Shoqërore. Sipas vendimit, pensionet urbane të pleqërisë shtohen me gati 500 lekë në muaj, nëse marrim si referencë vlerën mesatare të kësaj kategorie që në fund të 2024-ës ishte 19,600 lekë, ndërsa për pensionet rurale, shtesa është gati 300 lekë, pasi pensioni mesatar rural është 11,900 lekë. Kjo nuk konsiderohet rritje pensionesh, por vetëm kompensim për çmimet e rritura gjatë periudhës 2024-2025. Indeksimi këtë vit është më i ulët se vjet që në muajin tetor ishte 4.1 për qind dhe shkak për këtë është rënia e inflacionit në raport me periudhën 2023-2024. Shqipëria numëron në total 721 mijë pensionistë ku 630 mijë janë pleqërie urbane dhe 91 mijë janë rurale. Në buxhetin e shtetit për këtë indeksim janë parashikuar 11 milionë euro, që do të alokohen te Instituti i Sigurimeve Shoqërore për shpërndarje duke nisur nga muaji tetor.