Policia ka finalizuar me sukses një tjetër operacion për kapjen e personave në kërkim ndërkombëtar. Operacioni i koduar “Operacionalja 65” është zhvilluar në Peqin dhe ka çuar në arrestimin e një shtetasi të shpallur në kërkim nga drejtësia italiane. I arrestuari është Luan Gripshi banues në Peqin, i njohur edhe me emrin tjetër Rudin Gripshi. 52 vjeçari ishte në kërkim nga Interpol Roma, pasi ishte dënuar nga Gjykata e Apelit në Venecia, më datë 3 prill 2023, me 4 vite, 10 muaj dhe 14 ditë burg. Dënimi lidhet me përfshirjen e tij në një organizatë kriminale që merrej me trafikimin e lëndëve narkotike. Operacioni është zhvilluar nga Operacionalja, në kuadër të përpjekjeve për kapjen e personave të rrezikshëm dhe për t’i vënë ata përpara drejtësisë. Arrestimi i Gripshit është bërë me qëllim ekstradimin e tij në Itali, ku do të vuajë dënimin e dhënë nga gjykata.