Kryeministri në detyrë i Kosovës Avdullah Hoti, ka thënë të premten se pavarësisht atyre, që i ka cilësuar provokime nga shteti i Serbisë, Kosova po vazhdon sigurt rrugëtimin drejt anëtarësimit sa më të shpejtë në NATO, Bashkimin Evropian dhe institucione tjera të rëndësishme ndërkombëtare. Ai i ka bërë këto komente përmes një postimi në rrjetin social Facebook, duke thënë se Serbia ka pasur vazhdimisht qasje destruktive në raport me Kosovën, pavarësisht zotimeve që ka bërë Serbia për paqe, stabilitet dhe prosperitet në rajon. Deklaratat e Hotit vijnë një ditë pasi presidenti serb Aleksandar Vuçiq ka postuar në rrjete sociale flamurin serb mbi hartën e Kosovës. Ky veprim ka ngjallur reagime të shumta në Kosovë, si nga qytetarët, ashtu edhe nga politikanë e personalitete, edhe nga vendet tjera.