Koalicioni ‘Nisma Shqipëria Bëhet’ prezantoi kandidatët për qarkun e Tiranës gjatë një takimi me banorët e Kamzës. Kryetari për Tiranën, Endrit Shabani kërkoi shëputjen e elektoratit nga e kaluara për t’i dhënë jetë një klase të re politike. Shabani: “Gjatë takimeve në Kamëz pashë entuziasmin dhe qytetarë që e kanë vrarë frikën, por disa prej tyre ishin edhe të zhgënjyer. Mirëpo në këtë vend kanë qeverisur vetëm Rama dhe Berisha, njëherë njëri e njëherë tjetri. Prandaj ne jemi këtu pranë jush, ndërsa ata janë majë kodrës ku jetojnë me luks. Ndaj kur të vijnë t’ju kërkojnë votën, përgjigja duhet të jetë: JO!. Kur t’ju bjerë dera dhe i shihni te syri magjik për t’ju premtuar legalizimet, mos ua hapni derën. Kur t’i bien telefonit dhe t’ju premtojnë sërish ujë të pijshëm, mos ia hapni telefonin. Kur t’ju dalin në ekran dhe t’ju premtojnë rrugë, hapni dritaren dhe shihni se në çfarë gjendje është qyteti dhe më pas fikeni televizorin” Gjuha dhe metaforat e përdorura nga kryetarët e partive më të mëdha në vend: Edi Rama dhe Sali Berisha, sipas ‘Nismës Shqipëria Bëhet’ është shumë larg ballafaqimit të ideve dhe programeve që duhet të mbizotëronin fushatën politike.