Një grup hipopotamësh, një trashëgimi e padëshirueshme pas vdekjes së lordit kolumbian të drogës, Pablo Escobar, po sterilizohen. Escobar, që u qëllua për vdekje nga policia në 1993, importonte në mënyrë të paligjshme kafshë, përfshirë një hipopotam femër dhe një mashkull, që u quajtën asokohe hipopotamët e kokainës. Që atëherë, një popullatë në rritje ka pushtuar zonën perreth ish fermës së tij, Hacienda Napoles. Qeveria kolumbiane deri më tani ka sterilizuar 24 nga më shumë se 80 kafshë. Ata janë trajtuar me një kimikat që do ti bëjë sterilë. Ambjentalistët kolumbianë thonë se hipopotamët, që besohet se janë edhe tufa më e madhe jashtë afrikës, janë specie invazive dhe kanë dëmtuar dhe larguar faunën vendase. Shumëkush ka kërkuar ndërkohë vrasjen e kafshëve apo sterilizimin e tyre.