E premtja ishte dita e fundit e fushatës para zgjedhjeve për pushtetin komunal të së dieles në Kosovë. Autoritetet kanë bërë edhe përgatitjet e fundit për të siguruar një proces të qetë dhe demokratik. Kryetari i Komisionit Qendror Zgjedhor, Kreshnik Radoniqi, tha se janë kryer të gjitha veprimet që garantojnë mbarëvajtjen e procesit zgjedhor të së dielës, i cili do të mbikqyret nga rreth 25 mijë vëzhgues të akredituar. Në anën tjetër, 80 prokurorë janë angazhuar për të siguruar veprimet ligjore ndaj përpjekjeve të mundshme për keqpërdorim të votës në 38 komuna të Kosovës. Dhe mbi 3 mijë e 350 zyrtarë policorë do të jenë në detyrë të dielen për të siguruar këtë proces zgjedhor. Nga numri i përgjithshëm i vëzhguesve të zgjedhjeve, 177 janë pjesë e organizatave ndërkombëtare ndërsa 39 vijnë nga përfaqësitë diplomatike në Kosovë.