Kapiteni Tom Moore, 100 vjecari hero që mblodhi rreth 45 milionë dollarë për shërbimin kombëtar të shëndetit në britani, duke përshkuar me ecje disa herë gjatësinë e kopshtit të tij gjatë izolimit kombëtar të vitit të kaluar, është shtruar në spital me koronavirus. Në një postim në llogarinë e tij zyrtare në Tëitter, vajza e Moore, Hannah Ingram Moore, tha se veterani, që u shpall kalorës nga mbretëresha Elisabet për përpjekjen e tij vitin e shkuar, ka kaluar javën e shkuar duke u trajtuar për pneumoni dhe ka rezultuar pozitiv për koronavirusin. Ai ishte në shtëpi me ne, deri sot, kur u desh ndihmë shtesë me frymëmarrjen – tha e bija duke shtuar se ai po trajtohet tani në spital por jo në kujdes intensiv. Moore besohet se nuk është vaksinuar për koronavirus për shkak të mjekimit që ai merrte më herët për betejën e gjatë të tij me pneumoninë. Historia e tij, që e bëri atë të famshëm në të gjithë botën, nisi prillin e shkuar kur ai tentoi të mblidhte 1 mijë paundë për shërbimin kombëtar të shëndetësisë në vend duke përshkuar me ecje kopshtin e tij 25 metra të gjatë, vajtje ardhje për 100 herë. Por interesi i publikut, u rrit aq shumë sa që donacionet i kaluan parashikimet. Vetëm 24 orë pasi Moore nisi sfidën e tij, mblodhi 8750 euro. Deri më sot, totali i mbledhur prej tij ka shkuar në më shumë se 40 milionë.